Belangrike inligting:

Ons dagbesoekersfooie beloop R50 per volwassene, R30 per kind onder 13 jaar, en R20 per voertuig.

Die Trekkerkombuis-restaurant sal op versoek tot 19:00 oop wees, maar slegs vir bevestigde besprekings.

Akkommodasie 

Bloedrivier Gastehuis neem tans nie besprekings nie, aangesien ons besig is met herstelwerk ná skade wat deur ‘n onlangse storm veroorsaak is. Ons waardeer jul geduld en ondersteuning en sien uit daarna om binnekort weer gaste in ons pragtige omgewing te verwelkom. Hou ons blad dop vir terugvoer!

Oorsig:

Bloedrivier se gastehuis bestaan uit vier gastekamers en bied slaapplek vir 11 persone in totaal. Elke kamer is toegerus met ’n yskas en ketel (koffie, tee, melk en suiker ingesluit), en daar is braaigeriewe beskikbaar. Daar is ook gratis Wi-Fi beskikbaar in elke kamer, maar geen TV’s nie.

Kamer 1 (Andries Pretorius – Rooi kamer) is toegerus met ’n dubbel- en enkelbed, en ’n en suite-badkamer met ’n stort.

Kamer 2 (Sarel Cilliers – Groen kamer) is toegerus met ’n dubbelbed en ’n en suite-badkamer met ’n bad.

Kamer 3 (Karel Landman – Geel kamer) is toegerus met ’n dubbelbed en ’n en suite-badkamer met ’n stort.

Kamer 4 (Hans Dons de Lange – Oranje kamer) is toegerus met ’n dubbelbed en twee enkelbeddens, en ’n en suite-badkamer met ’n bad.

Selfsorgwoonstel

  • 6 gaste
  • 2 slaapkamers
  • Badkamer
  • Selfsorggeriewe
  • Gratis Wi-Fi

Tariewe:

  • R400 per persoon per nag (Sluit slegs verblyf en toegang tot museum in)

’n Minimum van vier persone word vereis vir ’n bespreking van die selfsorgwoonstel.

Oorsig:

Bloedrivier se selfsorgwoonstel het twee slaapkamers wat elkeen toegerus is met twee enkelbeddens.

Daar is ook twee enkelbeddens in die sitkamer, en ’n badkamer met ’n groot bad. Die kombuis is toegerus met al die nodige selfsorggeriewe soos ’n yskas, mikrogolfoond en tweeplaatstoof met ’n oond.

Die woonstel is toegerus met gratis Wi-Fi, maar geen TV’s nie. Daar is ook braaigeriewe beskikbaar.

Kampterrein

  • Maksimum 6 gaste per staanplek
  • 180 staanplekke
  • Kragpunte
  • Ablusiegeriewe
  • Braaigeriewe

Tariewe:

  • R100 per staanplek per dag
  • R80 per volwassene
  • R50 per kind onder 13 jaar en studente (Studente moet asseblief studentekaarte toon)

Die tarief sluit toegang tot die museum in. ’n Maksimum van ses persone en een voertuig word per staanplek toegelaat.

’n Addisionele R20 per voertuig per nag word gehef indien meer as een voertuig by ’n staanplek parkeer wil word.

Oorsig:

Bloedrivier se kampterrein beskik oor 180 staanplekke wat elkeen toegerus is met kragpunte.

Daar is ook ’n ablusieblok beskikbaar met heerlike warm water en opwasgeriewe.

Bronswalaer

  • 2 gaste per ossewa
  • 25 akkommodasiewaens
  • Waens toegerus met matrasse
  • Ablusiegeriewe
  • Braaigeriewe

Tariewe:

  • R140 per persoon per nag (Matras en toegang tot die museum ingesluit)

Belangrik: Gaste moet asseblief hul eie beddegoed saambring.

Oorsig:

Bloedrivier se bronswalaer bestaan uit 64 ossewaens wat in ’n laer getrek is op dieselfde plek as waar die oorspronklike laer in 1838 gestaan het tydens die Slag van Bloedrivier.

25 uit die 64 waens is tans toegerus met matrasse en kan elkeen twee gaste akkommodeer, dus 50 gaste in totaal.

Daar is ook ’n ablusieblok beskikbaar met heerlike warm water en opwasgeriewe, sowel as braaigeriewe.

Skoolgroepe

Opvoedkundige uitstappies:

Die Bloedrivier erfenisterrein het baie historiese gebiede in die omgewing. Dit sluit in die Groot Trek, die Anglo-Zoeloeoorlog van 1879 en die Anglo-Boereoorlog van 1899-1902.

  • Groepe kan die DVD oor die Slag van Bloedrivier sien en daarna die terrein besoek.
  • Skoolgroepe met hul eie slaapsakke is welkom om te oornag in die Sarel Cilliers Geloftesaal of in die Brons walaer.
  • Maaltye is beskikbaar op aanvraag.
  • Begeleide toere en gidse is beskikbaar op aanvraag. Kontak ons vir pryse en meer inligting. Vooruit besprekings is noodsaaklik.

Die Trekkerkombuis-restaurant 

Kom ervaar Afrikanergasvryheid by die Trekkerkombuis-restaurant en smul aan ons verskeidenheid tradisionele disse. Ontbyt, middagete en aandete kan bespreek word. Groepetes vir bv. Sondagmiddae kan ook bespreek word. Kapasiteit: 40 – 50 persone. Gelisensieerde kontantkroeg: bedien ’n verskeidenheid wyn en bier.

Die Smouswa-geskenkwinkel

Die Smouswa-geskenkwinkel het ’n verskeidenheid aandenkings wat besoekers kan koop om hul kuier by die Bloedrivier erfenisterrein te onthou. Memorabilia vanuit die Voortrekker-era, asook boeke en poskaarte is te koop en natuurlik het ons lekkers en koeldranke te koop vir besoekers wat kampeer of net kom inloer. Daar is ook braaihout, “blitz”, beperkte kruideniersware soos melk, koffie, suiker en ander benodigdhede vir diegene wat dalk ietsie vir die kamp agtergelaat het by die huis.

Die Sarel Cilliers Geloftesaal 

Die saal op ons terrein kan 900 mense akkommodeer. Jaarliks word die Geloftediens in die saal gehou, maar kan uitverhuur word vir funksies, konferensies, skoolgroepe, troues, danse en soveel meer. Daar is badkamerfasiliteite beskikbaar, ’n kroegtoonbank en is rolstoelvriendelik. Kontak ons vir meer inligting.